Берекелүү Аймак
2023-жылдын 26-июнунан 30-июнуна чейин Чунгбук университетинин (Корея Республикасы) профессорлору Кыргыз Республикасындагы «Берекелүү аймак» айылдарын комплекстүү өнүктүрүү долбооруна мониторинг жүргүзүү жана баалоо үчүн Кыргызстанга келишти. Алардын иш сапарынын максаты долбоордун натыйжалуулугун жана анын Ош жана Баткен облустарындагы 30 айылда жашаган жамааттардын жашоо шарттарын жакшыртууга тийгизген таасирин баалоо болгон.
Иш сапардын алкагында долбоордун ар кандай объектилерин, анын ичинде өнүктүрүү борборлорун, футбол аянтчаларын, газ жана суу менен камсыздоо системаларын, фельдшердик-акушердик пункттарды, ичүүчү суу резервуарларын, асфальтталган жолдорду жана бала бакчаларды карашты. Профессорлор жергиликтүү фермерлер менен активдүү баарлашып, алардын тажрыйбасын үйрөнүп, Кыргыз Республикасынын айыл чарбасы тууралуу түшүнүк алышты. Мониторингдин жана баалоонун натыйжалары консультациялар жана сунуштар аркылуу долбоорду башкарууда чечүүчү ролду ойноп, долбоордун максаттарына жетишүүгө олуттуу салым кошоору күтүлүүдө.
* Кыргыз Республикасындагы айылдарды комплекстүү өнүктүрүү долбоору Кыргыз Республикасынын Өкмөтү, Айыл чарба министрлиги жана KOICA менен биргеликте 4 жылдын ичинде 30 айылда жакырчылыкты кыскартууга багытталган. Социал-экономикалык шарттарды жакшыртууга, аялдардын укуктарын илгерилетүүгө, айыл чарбасын туруктуу өнүктүрүүгө жана айылды өнүктүрүү саясатын колдоого багытталган.
Ош шаарындагы №48 Керме-Тоо орто мектебинде жана М. Мырзаев атындагы №45 орто жалпы билим берүү мектебинде жогорку класстын окуучулары арасында экологиялык дебаттар (Eco-Debate) ийгиликтүү өткөрүлдү.
Көпчүлүк окуучулар үчүн бул дебаттарга биринчи жолу катышуу тажрыйбасы болгонуна карабастан, алар башынан эле чоң кызыгуу, активдүүлүк жана экологиялык актуалдуу маселелерди талкуулоого болгон чыныгы катышуусун көрсөтүштү. Иш-чаранын жүрүшүндө катышуучулар өз ойлорун жүйөлүү билдирүүгө, каршы тарапты угууга, командада иштөөгө жана биргелешип чечим табууга үйрөнүштү.
Эко-дебаттар коом алдында сүйлөө, сынчыл ой-жүгүртүү, лидерлик жана командада иштөө көндүмдөрүн өнүктүрүү үчүн маанилүү аянтча болду.
Мындай демилгелер жаштарды мындан ары өнүгүүгө жана жаңы дебаттык турнирлерге активдүү катышууга шыктандырып, жарандык активдүү позицияны калыптандырат деген үмүттөбүз.
Жалал-Абад облусунун Токтогул районуна караштуу Абды-Суеркулов айыл аймагындагы №21 Ы. Алымбеков атындагы орто мектебинин окуу-тарбия иштери боюнча директордун орун басары — Кадыралиева Элнура Сакабековна — өзүнүн жогорку жетишкендиктери, кесипкөйлүгү жана педагогикалык ишмердүүлүккө болгон берилгендиги менен кесиптештерине дем берип келет.
2026-жылдын жыйынтыгы менен ал «Жылдын мыкты мугалими» ардактуу наамына татыктуу болуп, ошондой эле «Улут сыймыгы» төш белгиси менен сыйланды.
Өзгөчө сыймык жараткан жетишкендиктеринин бири — 2026-жылдын 7-майында республикалык деңгээлде өткөн «Лидер мугалим» сынагына катышып, 651 мугалимдин арасынан мыкты жыйынтык көрсөтүп, Сингапурга билим берүү багытындагы жолдомону жеңип алышы болду.
Белгилей кетсек, Элнура Сакабековна Жалал-Абад облусунун Токтогул районундагы Бел-Алдыдагы Коомчулукту өнүктүрүү долбоорлорунун ишмердүүлүгүнө активдүү катышып, билим берүүнү өнүктүрүүгө, жергиликтүү коомчулуктун демилгелерин колдоого жана жаш муунду тарбиялоого зор салым кошуп келет.
Кадыралиева Элнура Сакабековнаны жетишкен ийгиликтери жана татыктуу сыйлыктары менен чын жүрөктөн куттуктайбыз! Бекем ден соолук, жаңы ийгиликтерди жана билим берүү тармагында мындан аркы чоң жетишкендиктерди каалайбыз!
2026-жылдын 21-майында Good Neighbors Kyrgyz Republic уюмунун директору Чо Сунхенг менен К.И. Скрябин атындагы Кыргыз улуттук агрардык университетинин ректору Нурзат Эрмековна Тотубаева менен жолугушуу болуп өттү.
Жолугушуунун жүрүшүндө тараптар мындан аркы кызматташуу маселелерин, биргелешкен ишмердүүлүктүн келечектүү багыттарын, ошондой эле айыл чарба, билим берүү жана жергиликтүү жамааттарды өнүктүрүү боюнча долбоорлорду ишке ашырууну талкуулашты. Өзгөчө көңүл инновациялык агротехнологияларды киргизүүгө, илимий-изилдөө иштерин өнүктүрүүгө жана фермерлердин квалификациясын жогорулатууга бурулду.
Жолугушуунун жыйынтыгында Good Neighbors Kyrgyz Republic менен К.И. Скрябин атындагы Кыргыз улуттук агрардык университетинин ортосунда Кызматташуу жөнүндө меморандумга кол коюлду. Меморандум заманбап агротехнологияларды киргизүү, айыл чарба өсүмдүктөрүн өстүрүү, анын ичинде IN VITRO илимий-өндүрүштүк лабораториясы аркылуу иш алып баруу, ошондой эле биргелешкен илимий жана билим берүү демилгелерин ишке ашыруу багытындагы өнөктөштүктү бекемдөөгө багытталган.
Кол коюу аземинен кийин Good Neighbors Kyrgyz Republic уюмунун өкүлдөрү үчүн IN VITRO илимий-өндүрүштүк лабораториясына экскурсия уюштурулду. Экскурсиянын жүрүшүндө лабораториянын ишмердүүлүгүнүн жыйынтыктары, анын ичинде заманбап биотехнологияларды колдонуу менен вируссуз картошка жана башка айыл чарба продукцияларын өстүрүү боюнча иштер тааныштырылды.
Белгилей кетсек, ушул жылы Good Neighbors Kyrgyz Republic университет менен биргеликте Ысык-Көл облусунун Болот Мамбетов айылында вируссуз көчөттөрдү өстүрүү боюнча пилоттук долбоорду ишке ашырууда.
Тараптар бул кызматташтык Кыргызстандын айыл чарбасын өнүктүрүүгө жана фермерлерди колдоого багытталган туруктуу жана натыйжалуу долбоорлорду ишке ашырууга өбөлгө түзөрүнө ишеним билдиришти.