Global Youth Network: Көк-Чү КӨДүндө GYN программасынын алгачкы сессиялары өттү
Көк-Чү Коомчулукту өнүктүрүү долбоорунда А. Токомбаев атындагы мектеп-комплексинде «Global Youth Network» («Глобалдык жаштар тармагы») программасынын алкагында даярдык боюнча бетме-бет сессия өткөрүлдү. Окуучулар алдыдагы алмашуу иш-чараларына даярдыктан өтүп, программанын алгачкы сабактарына активдүү катышышты. Жолугушуунун жүрүшүндө мектеп окуучулары өздөрүн тааныштырып, мектептери жана кызыгуулары тууралуу айтып беришип, баарлашууга жана тажрыйба алмашууга активдүү катышышты.
«Global Youth Network» — бул Good Neighbors International уюмунун ар кайсы өлкөлөрдүн балдарын жана жаштарын бириктирген эл аралык программасы. Программа глобалдык жарандыкты, лидерлик сапаттарды жана социалдык жоопкерчиликти өнүктүрүүгө багытталган. Долбоор балдар менен жаштардын дүйнөдөгү актуалдуу көйгөйлөр, Туруктуу өнүгүү максаттары (ТӨМ) тууралуу маалымдуулугун жогорулатууга, ошондой эле кызматташуу, баарлашуу жана коомдук турмушка активдүү катышуу көндүмдөрүн өнүктүрүүгө көмөктөшөт.
Алдыда катышуучуларды глобалдык көйгөйлөрдү жана Туруктуу өнүгүү максаттарын (ТӨМ) түшүнүүгө, лидерлик сапаттарын, сынчыл ой жүгүртүүсүн жана командада иштөө көндүмдөрүн өнүктүрүүгө багытталган бир катар окутуу сабактары жана практикалык иш-чаралар күтөт.
Программага катышуу аркылуу окуучулар глобалдык көйгөйлөр боюнча билимдерин кеңейтип, коммуникация, командада иштөө жана лидерлик көндүмдөрүн өнүктүрүп, өз коомчулугундагы маселелерди чечүүгө активдүү катышкан жарандарга айланат деп күтүлүүдө.
2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors International уюму Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу өз ара түшүнүшүү жөнүндө меморандумга кол коюшту.
Меморандумга кол коюу айыл аймактарын туруктуу өнүктүрүүгө жана айыл калкынын жашоо деңгээлин жогорулатууга багытталган өнөктөштүктү чыңдоодогу маанилүү кадам болду.
Долбоордун экинчи фазасы Ош, Баткен жана Жалал-Абад облустарында ишке ашырылып, фермерлерди жана айыл чарба кооперативдерин колдоону, айылдык жана логистикалык инфраструктураны өнүктүрүүнү, микрокредиттөө мүмкүнчүлүктөрүн кеңейтүүнү, ошондой эле агрардык секторго заманбап технологияларды киргизүүнү камтыйт.
Долбоор 2021–2025-жылдары ийгиликтүү ишке ашырылган биринчи фазанын уландысы болуп саналат. Бул мезгил аралыгында айыл чарбасынын өндүрүмдүүлүгүн жогорулатуу, мал чарбасын өнүктүрүү, айылдык инфраструктураны жакшыртуу жана айылдык үй чарбаларынын кирешелерин көбөйтүү боюнча олуттуу жыйынтыктарга жетишилди.
Долбоордун экинчи фазасын ишке ашыруу аймактардын агроөнөр жай потенциалын мындан ары өнүктүрүүгө, айылдык жамааттардын экономикалык туруктуулугун чыңдоого жана калктын жашоо сапатын жакшыртууга өбөлгө түзөт.
Урматтуу балдар, ата-энелер, мугалимдер жана өсүп келе жаткан муундун келечеги үчүн кам көргөн жалпыңыздар!
Good Neighbors Kyrgyz Republic сиздерди Эл аралык балдарды коргоо күнү менен чын жүрөктөн куттуктайт!
Бул күн бизге эң маанилүү нерсени эске салат: ар бир бала бактылуу балалыкка, сүйүүгө, камкордукка, коопсуздукка жана өз мүмкүнчүлүктөрүн толук ачууга татыктуу. Балдар — биздин келечегибиз, шыктандыруубуз жана жакшы дүйнөгө болгон үмүтүбүз.
35 жылдан бери Good Neighbors дүйнө жүзүндөгү балдардын жыргалчылыгы үчүн эмгектенип келет. Бүгүнкү күндө уюм 40тан ашуун өлкөдө миллиондогон адамдардын жашоосуна оң таасирин тийгизип, балдардын укуктарын коргоого, алардын бакубат жашоосуна жана коомчулуктардын инклюзивдүү өнүгүшүнө өзгөчө көңүл бурууда.
Кыргызстанда Good Neighbors Intentional өз ишмердүүлүгүн 2014-жылдан бери жүргүзүп келет. Ушул жылдар аралыгында биз өнөктөштөр, жергиликтүү жамааттар, мектептер жана үй-бүлөлөр менен биргеликте балдардын дени сак өсүшү, сапаттуу билим алышы, таланттарын өнүктүрүшү жана өздөрүн коопсуз сезиши үчүн шарттарды түзүп келебиз.
Бул өзгөчө күнү ар бир балага жаркын жылмаюу, кубанычтуу ачылыштар, ишенимдүү достор жана келечекке болгон бекем ишеним каалайбыз. Кыялдарыңар орундалып, силерди ар дайым колдогон, шыктандырган жана чоң ийгиликтерге карай алгачкы кадамды таштоого жардам берген адамдар жаныңарда болсун.
Майрамыңыздар менен! Эл аралык балдарды коргоо күнү кут болсун!
Калктын муктаждыктарын комплекстүү баалоонун алкагында Чүй, Ысык-Көл, Ош жана Жалал-Абад облустарындагы Көк-Чу, Болот Мамбетова, Бел-Алды жана Жапалак КӨДдөрүндө (Коомчулукту өнүктүрүү долбоорлору) фокус-топтук талкуулардын (Focus Group Discussions — FGD) сериясы ийгиликтүү өткөрүлдү.
Талкууларга мугалимдер, медицина кызматкерлери, ата-энелер, жаштар, фермерлер, ишкерлер, жергиликтүү өз алдынча башкаруу органдарынын өкүлдөрү, ошондой эле калктын аялуу катмарларынын өкүлдөрү катышты. Фокус-топтор жамааттардагы актуалдуу көйгөйлөрдү ачык талкуулоо, артыкчылыктуу муктаждыктарды аныктоо жана мүмкүн болгон чечимдерди издөө үчүн аянтча болуп берди.
Талкуулардын жүрүшүндө билим берүү, саламаттык сактоо, таза суу жана санитарияга жеткиликтүүлүк, укуктарды коргоо, социалдык колдоо, жумуш менен камсыз кылуу жана калктын киреше булактарын өнүктүрүү маселелери каралды. Өзгөчө көңүл аялуу топтордун көйгөйлөрүнө, негизги кызматтарга жеткиликтүүлүккө, жашоо шарттарын жакшыртууга жана жергиликтүү жамааттардын потенциалын чыңдоого бурулду.
Фокус-топтук талкуулар сапаттуу маалыматтарды чогултууга жана калктын муктаждыктарды баалоо процессине активдүү катышуусун камсыз кылууга мүмкүнчүлүк берди. Алынган жыйынтыктар келечектеги пландаштыруу иштеринде жана коомчулуктун реалдуу муктаждыктарына багытталган практикалык программаларды жана демилгелерди иштеп чыгууда колдонулат.