Good Neighbors Kyrgyz Republic уюмунун директору Токтогул районундагы коомчулуктарды өнүктүрүү долбо
2026-жылдын 12–13-март күндөрү Good Neighbors Kyrgyz Republic уюмунун директору Чо Сунхёнг Токтогул районундагы Бел-Алды, Уч-Терек жана Котормо айылдарына иш сапары менен барып, ишке ашырылган долбоорлордун жыйынтыктары жана коомчулуктарды өнүктүрүүгө багытталган учурдагы демилгелер менен таанышты.
Иш сапардын алкагында Токтогул районунун акиминин биринчи орун басары Асанов Аскат Таштемирович менен жолугушуу болуп өттү. Тараптар өткөн жылдагы биргелешкен иштин жыйынтыктарын, мындан аркы кызматташуу мүмкүнчүлүктөрүн, ошондой эле жергиликтүү коомчулуктардын жана жергиликтүү өз алдынча башкаруу органдарынын катышуусундагы биргелешкен каржылоо негизинде ишке ашырылып жаткан долбоорлордун туруктуулугун талкуулашты.
Уч-Терек айылындагы К. Токторалиев атындагы №30 орто мектепте директор «Дени сак тамактануу» долбоорунун алкагында орнотулган ашкана жабдуулары менен таанышып, мектептеги тамактануу шарттарын жана санитардык инфраструктураны жакшыртууга багытталган иштер менен таанышты. Ошондой эле Girls Friendly Toilets долбооруна өзгөчө көңүл бурулуп, анын курулушу аяктоо баскычына жакындап калгандыгы белгиленди.
Бел-Алды айылында директор Мукаш Жамгырканов атындагы мектепке барып, биргелешкен каржылоо негизинде түзүлгөн IT-класс жана орнотулган интерактивдүү такталар менен таанышты. Сапардын жүрүшүндө окуучулар санариптик жабдууларды окуу процессинде кантип колдонуп жатканын көрсөтүштү. Заманбап технологияларды киргизүү окуучулардын санариптик көндүмдөрүн өнүктүрүүгө жана билим алуу мүмкүнчүлүктөрүн кеңейтүүгө өбөлгө түзүүдө.
Котормо айылында директор Абды Суеркулов айыл өкмөтү жана Good Neighbors Kyrgyz Republic уюмунун биргелешкен аракеттеринин натыйжасында түзүлгөн бала бакчага барды. Сапардын жүрүшүндө мектепке чейинки билим берүүнүн туруктуулугу жана мындан ары өнүктүрүү маселелери талкууланды.
Жыйынтыгында, иш сапар коомчулуктардын активдүү катышуусу менен ишке ашырылып жаткан долбоорлордун оң таасирин тастыктап, жергиликтүү тургундар, жергиликтүү өз алдынча башкаруу органдары жана Good Neighbors Kyrgyz Republic уюмунун ортосундагы өнөктөштүктүн туруктуу аймактык өнүгүү үчүн маанилүүлүгүн дагы бир жолу белгиледи.
26-июнда Кыргыз Республикасынын бардык аймактарында мектеп бүтүрүүчүлөрүнө аттестат тапшыруу аземдери салтанаттуу түрдө өткөрүлдү. Бул өзгөчө күн жашоодогу маанилүү этаптын аякташын жана мүмкүнчүлүктөргө, үмүттөргө жана чоң ийгиликтерге бай жаңы жолдун башталышын белгиледи.
Ош облусундагы Жапалак Коомчулукту өнүктүрүү долбооруна (Japalak CDP) караштуу мектептердин бүтүрүүчүлөрү да мектепти аяктаганын салтанаттуу белгилешти. Бул күндү дагы да кубанычтуу жана эстен кеткис кылуу максатында, Good Neighbors Kyrgyz Republic «Айыл жаштарынын өз алдынча жашоого өтүүсүн колдоо жана билим алууга болгон мотивациясын жогорулатуу» (Rural Youth Transition & Educational Motivation Initiative) долбоорунун алкагында бүтүрүүчүлөр үчүн эстелик белектерди жана таттуу белектерди даярдады.
Бардык бүтүрүүчүлөрдү бул маанилүү окуя менен чын жүрөктөн куттуктайбыз! Алдыңарда жаңы билимдерге, кеңири мүмкүнчүлүктөргө, тайманбас чечимдерге жана эң чоң кыялдарыңарды ишке ашырууга жол ачылсын. Өз күчүңөргө ишенип, шыктануу менен алдыга умтулуп, жаңы жашоо баскычында чоң ийгиликтерге жетишиңерди каалайбыз!
29-июнда Good Neighbors Kyrgyz Republic уюму Ысык-Көл облусунун Кажы-Сай айылындагы Болот Мамбетов Коомчулукту өнүктүрүү долбооруна (КӨД) караштуу мектептердин 80 бүтүрүүчүсү үчүн бир күндүк тренинг өткөрдү.
Тренинг жаштарды чоң турмушка өтүү мезгилинде колдоого, алардын мындан аркы билим алуу жана кесиптик жолун тандоосуна көмөк көрсөтүүгө, ошондой эле өз күчүнө болгон ишенимин арттырууга багытталды.
Программа Good Neighbors уюмунун ишмердүүлүгү жана уюм менен мындан ары кызматташуу мүмкүнчүлүктөрү тууралуу тааныштыруу сессиясы менен башталды. Андан соң катышуучулар жеке жана финансылык жоопкерчилик, коопсуздук, документтерди тариздөө, аң-сезимдүү чечим кабыл алуу жана мүмкүн болгон тобокелчиликтерден коргонуу маселелерин талкуулашты.
Өзгөчө көңүл мектепти аяктагандан кийинки келечекти тандоо темасына бурулду. Бүтүрүүчүлөр билим алууну улантуу, кесиптик өнүгүү, жумушка орношуу, максат коюу жана кесипти аң-сезимдүү тандоо тууралуу пикир алышты. Ошондой эле жаштардын жарандык активдүүлүгү жана ыктыярчылык мүмкүнчүлүктөрү менен таанышып, коомдук турмушка катышуу лидерлик сапаттарды өнүктүрүүгө жана пайдалуу тажрыйба топтоого кандайча жардам берерин талкуулашты.
Практикалык бөлүктө катышуучулар баарлашуу, өзүн тааныштыруу жана командада иштөө көндүмдөрүн өнүктүрүштү. Ошондой эле Good Neighbors Бүтүрүүчүлөр клубун түзүү демилгеси сунушталып, анын бүтүрүүчүлөрдүн өз ара байланышып, тажрыйба алмашуусуна жана коомдук демилгелерге катышуусуна өбөлгө түзөрү айтылды.
Күн бою бүтүрүүчүлөр интерактивдүү тапшырмаларга, командалык оюндарга жана тематикалык квизге активдүү катышышты. Иш-чара эстелик белектерди тапшыруу жана жалпы сүрөткө түшүү менен жыйынтыкталды.
Бардык бүтүрүүчүлөргө алдыга ишенимдүү кадам таштап, жаңы мүмкүнчүлүктөрдөн коркпой, келечегиңерди тайманбай курууну каалайбыз!
26-июнда Кыргыз Республикасынын бардык аймактарында мектеп бүтүрүүчүлөрүнө аттестат тапшыруу аземдери салтанаттуу түрдө өткөрүлдү. Алардын катарында Жалал-Абад облусунун Токтогул районундагы Бел-Алды, Сары-Сөгөт, Коргон, Саргата жана Үч-Терек айылдарынын бүтүрүүчүлөрү да болуп, бул күн алардын мектептеги жолунун жыйынтыгы жана жашоодогу жаңы баскычтын башталышы болду.
Бул өзгөчө күндү дагы да кубанычтуу жана эстен кеткис кылуу максатында, Good Neighbors Kyrgyz Republic уюму «Айыл жаштарынын өз алдынча жашоого өтүүсүн колдоо жана билим алууга болгон мотивациясын жогорулатуу» долбоорунун алкагында бүтүрүүчүлөр үчүн эстелик белектерди жана таттуу белектерди даярдады. Бул чакан белектер салтанаттуу күнгө өзгөчө жылуулук тартуулап, бүтүрүүчүлөргө жагымдуу эмоцияларды жана өмүрүндөгү эң маанилүү күндөрдүн бири тууралуу жаркын эскерүүлөрдү тартуулады.
Бардык бүтүрүүчүлөрдү мектепти ийгиликтүү аякташы менен куттуктайбыз! Алган билимиңиздер келечектеги ийгиликтериңиздердин бекем пайдубалы болуп, алдыда жаңы мүмкүнчүлүктөр, тайманбас чечимдер жана чоң жетишкендиктер коштосун!