Good Neighbors Kyrgyz Republic уюмунун директору Токтогул районундагы коомчулуктарды өнүктүрүү долбо
2026-жылдын 12–13-март күндөрү Good Neighbors Kyrgyz Republic уюмунун директору Чо Сунхёнг Токтогул районундагы Бел-Алды, Уч-Терек жана Котормо айылдарына иш сапары менен барып, ишке ашырылган долбоорлордун жыйынтыктары жана коомчулуктарды өнүктүрүүгө багытталган учурдагы демилгелер менен таанышты.
Иш сапардын алкагында Токтогул районунун акиминин биринчи орун басары Асанов Аскат Таштемирович менен жолугушуу болуп өттү. Тараптар өткөн жылдагы биргелешкен иштин жыйынтыктарын, мындан аркы кызматташуу мүмкүнчүлүктөрүн, ошондой эле жергиликтүү коомчулуктардын жана жергиликтүү өз алдынча башкаруу органдарынын катышуусундагы биргелешкен каржылоо негизинде ишке ашырылып жаткан долбоорлордун туруктуулугун талкуулашты.
Уч-Терек айылындагы К. Токторалиев атындагы №30 орто мектепте директор «Дени сак тамактануу» долбоорунун алкагында орнотулган ашкана жабдуулары менен таанышып, мектептеги тамактануу шарттарын жана санитардык инфраструктураны жакшыртууга багытталган иштер менен таанышты. Ошондой эле Girls Friendly Toilets долбооруна өзгөчө көңүл бурулуп, анын курулушу аяктоо баскычына жакындап калгандыгы белгиленди.
Бел-Алды айылында директор Мукаш Жамгырканов атындагы мектепке барып, биргелешкен каржылоо негизинде түзүлгөн IT-класс жана орнотулган интерактивдүү такталар менен таанышты. Сапардын жүрүшүндө окуучулар санариптик жабдууларды окуу процессинде кантип колдонуп жатканын көрсөтүштү. Заманбап технологияларды киргизүү окуучулардын санариптик көндүмдөрүн өнүктүрүүгө жана билим алуу мүмкүнчүлүктөрүн кеңейтүүгө өбөлгө түзүүдө.
Котормо айылында директор Абды Суеркулов айыл өкмөтү жана Good Neighbors Kyrgyz Republic уюмунун биргелешкен аракеттеринин натыйжасында түзүлгөн бала бакчага барды. Сапардын жүрүшүндө мектепке чейинки билим берүүнүн туруктуулугу жана мындан ары өнүктүрүү маселелери талкууланды.
Жыйынтыгында, иш сапар коомчулуктардын активдүү катышуусу менен ишке ашырылып жаткан долбоорлордун оң таасирин тастыктап, жергиликтүү тургундар, жергиликтүү өз алдынча башкаруу органдары жана Good Neighbors Kyrgyz Republic уюмунун ортосундагы өнөктөштүктүн туруктуу аймактык өнүгүү үчүн маанилүүлүгүн дагы бир жолу белгиледи.
1. Коммерциялык сунуштарды суроо: «Тең-теңи менен» тренингин өткөрүү боюнча колдонмону жаңылоо жана актуалдаштыруу
Долбоор жөнүндө:
Өспүрүмдөр үчүн «Менин укуктарым» жана «Өспүрүмдөр арасындагы зомбулуктун алдын алуу» темалары боюнча колдонмонун мазмунун актуалдаштыруу. Долбоор колдонуудагы версияны талдоону, методологиялык бөлүктү, окуу материалдарын, көнүгүүлөрдү жана кейстерди Кыргыз Республикасынын мыйзамдарына, БУУнун Балдардын укуктары жөнүндө конвенциясына, балдарды коргоо, гендердик теңчилик жана инклюзия принциптерине ылайык кыргыз жана орус тилдеринде жаңылоону камтыйт. Колдонмонун акыркы көлөмү: 50дөн 90 баракка чейин. Жумуштарды аткаруу мөөнөтү — 2026-жылдын 30-сентябрына чейин.
Коммерциялык сунуштарды тапшыруунун акыркы мөөнөтү: 16-сентябрь, 2026-жыл, саат 19:00
Кененирээк маалыматты tenders.kg сайтынан 03.09.2026-жылдагы №31604 «Коммерциялык сунуштарды суроо: «Тең-теңи менен» тренингин өткөрүү боюнча колдонмону жаңылоо жана актуалдаштыруу» номери астынан караңыздар.
2. Коммерциялык сунуштарды суроо: Мектепке чейинки жана мектеп курагындагы балдар үчүн куурчак спектаклдерин жана форум-театр иш-чараларын уюштуруу жана өткөрүү боюнча методикалык колдонмону иштеп чыгуу
Долбоор жөнүндө:
Коопсуз жана инклюзивдүү чөйрөнү түзүүгө багытталган «Балдардын үнү» долбоорунун алкагында практикалык методикалык колдонмону иштеп чыгуу. Аткаруучу методиканы, баалоо куралдарын, кыргыз жана орус тилдеринде куурчак спектаклдеринин кем эмес 5 сценарийин (5–6 жаштагы балдар үчүн) жана форум-театрдын кем эмес 5 сценарийин (10–17 жаштагы балдар үчүн) даярдашы керек. Колдонмо мугалимдерге, психологдорго жана социалдык педагогдорго арналган. Болжолдуу аткаруу мөөнөтү — келишимге кол коюлган күндөн тартып 30 күн.
Коммерциялык сунуштарды тапшыруунун акыркы мөөнөтү: 16-сентябрь, 2026-жыл, саат 19:00
Кененирээк маалыматты tenders.kg сайтынан 03.09.2026-жылдагы №31608 «Коммерциялык сунуштарды суроо: Мектепке чейинки жана мектеп курагындагы балдар үчүн куурчак спектаклдерин жана форум-театр иш-чараларын уюштуруу жана өткөрүү боюнча методикалык колдонмону иштеп чыгуу» номери астынан караңыздар.
4-сентябрда Ош шаарында БУУнун Дүйнөлүк азык-түлүк программасы (БУУ ДАТП) Корея Эл аралык Кызматташтык Агенттиги (KOICA), КР Агартуу министрлиги, КР Саламаттыкты сактоо министрлиги жана Good Neighbors Kyrgyz Republic уюму менен биргеликте Кыргызстандын түштүк аймактарындагы мектеп өкүлдөрү үчүн мектептеги суу менен камсыздоо, санитария жана гигиена (WASH) боюнча практикалык семинар өткөрдү.
Ош шаарындагы семинар 28-августта Бишкек шаарында башталган демилгенин уландысы болуп, Ош, Жалал-Абад жана Баткен облустарынын мектеп директорлорун, педагогдорун, ошондой эле мектептеги саламаттыкты сактоо жана суу менен камсыздоо, санитария жана гигиена (WASH) комитеттеринин өкүлдөрүн бириктирди.
Семинардын башкы максаты мектеп администрацияларына таза суу, санитария жана гигиена (WASH) чараларын киргизүү боюнча практикалык колдонмону жана маалыматтык-билим берүү материалдарын (буклеттерди жана плакаттарды) тапшыруу болду.
Мектептерде суу менен камсыздоо, санитария жана гигиена (WASH) багытын өнүктүрүү эмнелерди камтыйт?
🔹 Коопсуз таза сууга жана сапаттуу санитардык шарттарга жеткиликтүүлүк.
🔹 Кол жуу үчүн ыңгайлуу жайлар жана тамактануу гигиенасынын эрежелерин сактоо.
🔹 Бардык балдар, анын ичинде майыптыгы бар балдар үчүн инклюзивдүү, жеткиликтүү жана ыңгайлуу чөйрөнү түзүү.
Өлкөнүн бардык аймактарында таза суу, санитария жана гигиена (WASH) чараларын жайылтуу - ар бир бала үчүн коопсуз, дени сак жана инклюзивдүү чөйрөнү түзүүгө кошкон бирдиктүү салымыбыз!
2026-жылдын 25-августунда Котормо айылындагы К. Чокоев атындагы мектептин базасында «Green Schools for Healthy Nutrition» долбоорунун алкагында «Good Neighbors Kyrgyz Republic» филиалы тарабынан уюштурулган «Мектептерде туура тамактанууну уюштуруу» деген темада практикалык семинар өттү.
Үч-Терек жана Бел-Алды аймактарынан келген мектеп директорлору мектеп алдындагы чарбаны түзүүнүн ийгиликтүү тажрыйбасын үйрөнүү үчүн чогулушту: алма, жашылчаларды, ал тургай банан менен лимонду өстүрүүдөн баштап, бир сезондо эки жолу түшүм алууга жана аны сактоо үчүн атайын жер төлөнү курууга чейинки тажрыйбалар менен таанышышты.
Семинардын катышуучусу менен маек:
Мукаш Жамгырканов атындагы мектептин директору Шарипова Жазгүл Үчбаевна өзүнүн таасирлери жана мектеп алдындагы участогун өнүктүрүү пландары менен бөлүштү:
«Бүгүн биз семинарга катышып, абдан чоң таасир алдык. Биздин мектеп буга чейин эле алма бак тигүү боюнча Garden долбоорун ишке ашырууга аракет кылган: ылайыктуу жерлерди даярдап, кыртыштын анализдерин тапшырып, бардык документтерди өз убагында бергенбиз. Бул семинар бизге кайрадан дем-күч берди! Биздин мектепте да алма бак жана толук кандуу мектеп алдындагы чарба пайда болушу үчүн бардык күчүбүздү жумшоого аракет кылабыз, ошондой эле бул демилгени ишке ашырууда сиздердин колдооңуздарга абдан ишенебиз».
Мектеп алдындагы чарба — бул балдарды жаңы азык-түлүктөр менен камсыз кылууга, күнүмдүк ысык тамакты байытууга жана өсүп келе жаткан муундун ден соолугун чыңдоого жардам берген натыйжалуу жана жеткиликтүү курал!
Инстаграм видеосу