КӨҢҮЛ БУРУҢУЗДАР! ТЕНДЕРЛЕР!
1. Коммерциялык сунуштарды суроо: «Балдар бакчасы үчүн курулуш материалдары»
Долбоор жөнүндө:
Жалал-Абад облусунун Үч-Терек айылындагы балдар бакчасынын имаратын кеңейтүү (кошумча имаратты куруу үчүн курулуш, жасалгалоо, электр-техникалык, жылуулук изоляциялоочу материалдарды жана сантехникалык жабдууларды сатып алуу, жеткирүү жана түшүрүү), ошондой эле Чүй облусунун Нижне-Чүй айыл өкмөтүндөгү балдар бакчасы үчүн балдар унитаздарын сатып алуу жана жеткирүү. Долбоор балдардын болуу шартын жакшыртууга жана мектепке чейинки мекемелердин материалдык-техникалык базасын чыңдоого багытталган.
Коммерциялык сунуштарды тапшыруунун акыркы мөөнөтү: 2026-жылдын 16-сентябры, саат 17:30га (18:00) чейин
Тапшыруу ыкмасы: «Балдар бакчасы үчүн курулуш материалдары» белгиси менен administration@goodneighbors.kg электрондук дарегине жөнөтүү керек
Төлөгүрөөк маалыматты tenders.kg сайтынан 10.09.2026-жылдагы №31706 «Коммерциялык сунуштарды суроо: «Балдар бакчасы үчүн курулуш материалдары»» номери аркылуу караңыздар.
2. Тендер: Балдар бакчалары үчүн оюн жабдууларын, эмеректерди жана окуу-өнүктүрүү материалдарын сатып алуу, жеткирүү жана орнотуу
Долбоор жөнүндө:
Ош, Ысык-Көл, Чүй жана Жалал-Абад облустарынын мектепке чейинки мекемелеринде коопсуз, комфорттуу жана өнүктүрүүчү чөйрөнү түзүү. Долбоордун милдеттерине сырткы оюн жабдууларын (беседкалар, кумдондор, дөңсөөлөр, маятниктер, каруселдер, оюн үйлөрү) сатып алуу, ташуу, түшүрүү, чогултуу жана монтаждоо, ошондой эле имараттын ичин эмеректер (кербештер, отургучтар, шкафтар), тиричилик техникасы (телевизорлор), килемдер жана окуу-өнүктүрүү топтомдору менен камсыздоо кирет.
Тендердик билдирмелерди тапшыруунун акыркы мөөнөтү: 2026-жылдын 16-сентябры, саат 17:00гө (17:30) чейин
Тапшыруу ыкмасы: милдеттүү түрдө «Балдар бакчалары үчүн жабдуулар жана эмеректер» деген маркировкасы бар чапталган А4 конвертинде Бишкек ш., Жаш Гвардия проспектиси, 2/1 (2-кабат) дареги боюнча тапшыруу керек.
Төлөгүрөөк маалыматты tenders.kg сайтынан 10.09.2026-жылдагы №31708 «Тендер: Балдар бакчалары үчүн оюн жабдууларын, эмеректерди жана окуу-өнүктүрүү материалдарын сатып алуу, жеткирүү жана орнотуу» номери аркылуу караңыздар.
2026-жылдын 2-июнунда Бишкек шаарында Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors Kyrgyz Republic тарабынан биргелешип ишке ашырылып жаткан Кыргыз Республикасында Айылдарды комплекстүү өнүктүрүү долбоорунун экинчи фазасынын расмий ачылыш аземи болуп өттү.
Иш-чарага Кыргыз Республикасынын Суу ресурстары, айыл чарба жана кайра иштетүү өнөр жайы министринин орун басары Рустам Анарбекович Балтабаев, Корея Республикасынын Кыргыз Республикасындагы Атайын жана Ыйгарым укуктуу Элчиси Ким Кванджэ, Кыргыз Республикасындагы KOICA өкүлчүлүгүнүн директору Лим Соён, Good Neighbors Kyrgyz Republic уюмунун директору Чо Сунхенг, ошондой эле мамлекеттик органдардын, эл аралык уюмдардын жана өнөктөш мекемелердин өкүлдөрү катышты.
Коноктор өздөрүнүн куттуктоо сөздөрүндө Кыргыз Республикасындагы Айылдарды комплекстүү өнүктүрүү долбоорунун аймактардын туруктуу социалдык-экономикалык өнүгүүсү үчүн стратегиялык маанисин белгилешип, Кыргыз Республикасы менен Корея Республикасынын ортосундагы кызматташтыкты мындан ары чыңдоонун маанилүүлүгүн баса белгилешти.
Аземдин жүрүшүндө долбоордун биринчи фазасынын негизги жыйынтыктары жана Ош, Баткен жана Жалал-Абад облустарында ишке ашырыла турган экинчи фазанын негизги багыттары тааныштырылды.
Белгилей кетсек, буга чейин, 2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, Кореянын эл аралык кызматташтык агенттиги (KOICA) жана Good Neighbors Kyrgyz Republic Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу Өз ара түшүнүшүү жөнүндө меморандумга кол коюшкан.
Долбоордун жаңы этабы фермерлерди жана айыл чарба кооперативдерин колдоого, кайра иштетүү тармагын өнүктүрүүгө, айылдык инфраструктураны модернизациялоого, логистикалык борбор түзүүгө, микрокаржылоо кызматтарына жеткиликтүүлүктү кеңейтүүгө жана агрардык секторго санариптик чечимдерди киргизүүгө багытталган.
Биз биргеликте айыл аймактарынын туруктуу өнүгүүсүнө көмөк көрсөтүү, айыл калкынын бакубаттуулугун жогорулатуу жана Кыргыз Республикасынын агроөнөр жай потенциалын чыңдоо багытындагы иштерди улантабыз.
2026-жылдын 1-июнунда Кыргыз Республикасынын Суу ресурстары, айыл чарба жана кайра иштетүү өнөр жайы министрлиги, KOICA жана Good Neighbors International уюму Кыргыз Республикасында Айылдарды комплекстүү өнүктүрүү долбоорунун экинчи фазасын ишке ашыруу боюнча үч тараптуу өз ара түшүнүшүү жөнүндө меморандумга кол коюшту.
Меморандумга кол коюу айыл аймактарын туруктуу өнүктүрүүгө жана айыл калкынын жашоо деңгээлин жогорулатууга багытталган өнөктөштүктү чыңдоодогу маанилүү кадам болду.
Долбоордун экинчи фазасы Ош, Баткен жана Жалал-Абад облустарында ишке ашырылып, фермерлерди жана айыл чарба кооперативдерин колдоону, айылдык жана логистикалык инфраструктураны өнүктүрүүнү, микрокредиттөө мүмкүнчүлүктөрүн кеңейтүүнү, ошондой эле агрардык секторго заманбап технологияларды киргизүүнү камтыйт.
Долбоор 2021–2025-жылдары ийгиликтүү ишке ашырылган биринчи фазанын уландысы болуп саналат. Бул мезгил аралыгында айыл чарбасынын өндүрүмдүүлүгүн жогорулатуу, мал чарбасын өнүктүрүү, айылдык инфраструктураны жакшыртуу жана айылдык үй чарбаларынын кирешелерин көбөйтүү боюнча олуттуу жыйынтыктарга жетишилди.
Долбоордун экинчи фазасын ишке ашыруу аймактардын агроөнөр жай потенциалын мындан ары өнүктүрүүгө, айылдык жамааттардын экономикалык туруктуулугун чыңдоого жана калктын жашоо сапатын жакшыртууга өбөлгө түзөт.
Урматтуу балдар, ата-энелер, мугалимдер жана өсүп келе жаткан муундун келечеги үчүн кам көргөн жалпыңыздар!
Good Neighbors Kyrgyz Republic сиздерди Эл аралык балдарды коргоо күнү менен чын жүрөктөн куттуктайт!
Бул күн бизге эң маанилүү нерсени эске салат: ар бир бала бактылуу балалыкка, сүйүүгө, камкордукка, коопсуздукка жана өз мүмкүнчүлүктөрүн толук ачууга татыктуу. Балдар — биздин келечегибиз, шыктандыруубуз жана жакшы дүйнөгө болгон үмүтүбүз.
35 жылдан бери Good Neighbors дүйнө жүзүндөгү балдардын жыргалчылыгы үчүн эмгектенип келет. Бүгүнкү күндө уюм 40тан ашуун өлкөдө миллиондогон адамдардын жашоосуна оң таасирин тийгизип, балдардын укуктарын коргоого, алардын бакубат жашоосуна жана коомчулуктардын инклюзивдүү өнүгүшүнө өзгөчө көңүл бурууда.
Кыргызстанда Good Neighbors Intentional өз ишмердүүлүгүн 2014-жылдан бери жүргүзүп келет. Ушул жылдар аралыгында биз өнөктөштөр, жергиликтүү жамааттар, мектептер жана үй-бүлөлөр менен биргеликте балдардын дени сак өсүшү, сапаттуу билим алышы, таланттарын өнүктүрүшү жана өздөрүн коопсуз сезиши үчүн шарттарды түзүп келебиз.
Бул өзгөчө күнү ар бир балага жаркын жылмаюу, кубанычтуу ачылыштар, ишенимдүү достор жана келечекке болгон бекем ишеним каалайбыз. Кыялдарыңар орундалып, силерди ар дайым колдогон, шыктандырган жана чоң ийгиликтерге карай алгачкы кадамды таштоого жардам берген адамдар жаныңарда болсун.
Майрамыңыздар менен! Эл аралык балдарды коргоо күнү кут болсун!